منتجات فرسالي والفرق بينهم

مرحبا بنات، قعدت لكم كم يوم بس احجهز بوست خاص لمنتجات فرسالي، واااايد انسأل عنهم وشو الفرق بينهم خاصة انه الحين نزلت الشركة منتج جديد وفي وايد بنات تلخبطوا بين المنتجات ومب عارفين شو ياخذون.

كتبت لكم عن كل منتج بالتفصيل والكلام هذا منقول بترجمتي واسلوبي من موقع فرسالي، حاولت ابسط الكلام واخليه مفهوم كثر ماقدر، شوفوا شو المنتج الي يناسب بشرتكم ونمط حياتكم.

بالنسبة الى وين تقدرون تحصلون منتجات فرسالي، موقع فرسالي بنفسه يشحن لكل دول العالم، ممكن تجيكون الموقع للتوصيل والاسعار وكل شي.

اوكي نقول بسم الله ونبدأ:

الالكسير البركاني – ترطيب البشرة (الغرشة السودا): هذا أول منتج نزلته شركة فرسالي، وهو عبارة عن زيت تامانو خالص، هذا الزيت يستخلص من ثمرة التامانو في بولينيزيا والي تزع في تربة بركانية ويخلي مفعوله أفضل لانه تكون فيه معادن من البركان، في منه نفس الزيت (تامانو) تسويه شركلت ثانية بس ينزع في تربه ثانية، غير بركانية وخصائصه تكون مختلفة.

هذا الزيت فيه خصائص علاجية ومنها انه يجدد خلايا البشرة فهو مناسب لعلاج البشرة المتضررة والي تعرضت للشمس بكثرة والي فيها حبوب وغير هذا هو مضاد اكسدة ومضاد حيوي ومضاد ميكروبي ومضاد للالتهاب والي يعتبر مناسب للبشرة الي تعاني من حب الشباب. والي يميز هذا الزيت انه فيه مادة دهنية اسمها calophyllolide وغير موجودة في اي زيت ثاني وهذا يعتبر مضاد التهاب قوي.

بسبب خصائصه العلاجية فهو مناسب جدا للبشرة الي تعاني من حب الشباب والي فيها آثار الحبوب، ومناسب ايضا للبشرة الجافة والمتقشرة، و بعد مناسب لعلامات تمدد الجسم.

الزيت له ريحه قوية وهم يوصفونها بانها ريحة ترابية، كم قطرة كافية للبشرة، يعني من ٢-٣ قطرات يكفي، وشركة فرسالي تنصح باستخدامه كمنتج مسائي. حجم الغرشة ٣٠ مل وسعره ٣٧ دولار امريكي.

الحين كل الوصف الي كتبته لكم من موقع الشركة، أنا بديت استخدمه من أول مانزل، صاحبة الشركة الي هي فرح دوكاي كانت تتكلم انها بتنزل منتج ووقتها كنت اتابعها واتريا متي تنزله. المهم طلبته واستخدمته فترة طويلة وعجبني وايد لاني فعلا حسيته مناسب لبشرتي الدهنية والمعرضة للحبوب، ريحته مثل ماقالوا قوية بعض الناس يقولون ريحته خايسة بس انا تعودت عليه وصرت احبه وخلصت منه غراش، شفته وايد يخفف لي الحبوب ويصفي بشرتي مع الاستمرار.

الزيت لونه أصفر على أخضر فاتح، هو زيت بس اذا الجو بارد ممكن يتجمد شوي وهل شي طبيعي ووايد ناس علقوا على هذا الشي بس الزيت مب خربان. الي في الصورة الزيت شوي متجمد لانه غرفتي باردة والزجاج شوي مضبب بس اذا درجة الحرلرة عادية يكون زيت عادي، أخض الغرشة عدل ويذوب.

———————————————

المنتج الثاني هو الكسير الروز غولد، ترطيب يعطي نور واشراق للبشرة.

مرطب صباحي للبشرة، تم تطويره من قبل مجموعة من خبراء التجميل في أمريكا، هذا الزيت خفيف جدا على البشرة وفيه خصائص تحارب الشيخوخة ومناسب لجميع أنواع البشرة. الزيت فيه قشر الذهب بس يذوب وتمتصه البشرة وقت الاستخدام والذهب يخلي البشرة منورة ونضرة بشكل طبيعي، وعشان تطلع قشور الذهب عدل لازم نرج الغرشة قبل الاستخدام.

ومن مكوناته زيت الروز هيب والي فيه أحماض دهنية بنسبة ٧٧٪، وله نسب عالية من اللينوليك وحمض اللينوليك، فيتامين سي و أ الي فيه الريتينول (لمحاربة الشيخوخة)، وزيت الروز هيب يجدد الخلايا ويقلل من ظهور الخطوط الرفيعة والتصبغات وعلامات تمدد الجلد.

الحين هذا الزيت اشتهر بالذات بين اليوتيوبرز لانه بدوا يستخدمونه في اشيا ثانية غير كمرطب للبشرة، بدوا يستخدمونه كمرطب شفايف بانهم يحطونه على شفايفهم كمرطب قبل الروج، وغير هذا يخلطون كم قطرة من الفونديشن او يحطونه على البيوتي بلندر ويدمجون به الفونديشن، هاذي الطريقة تعطي ترطيب زيادة ونضارة للبشرة، بس انتبهوا اذا بشرتكم دهنية يمكن ماتنفع معاكم هاذي الطريقة، هل شي مناسب أكثر للي بشرتهم جافة.

من مكونات الزيت:

زيت الروز هيب.

زيت اليقطين.

ذهب قيراط ٢٤.

فيتامين هـ .

زيت اليمون جراس.

زيت قشر البرتقال.

هذا الزيت له ريحة مختلفة عن الي قبله، ريحته حلوة شوي انا حبيتها بس في وايد بنات قالولي ريحته اوميغا ٣ بس انا اشوفه عادي. ماستخدمت هذا الزيت بكثرة لاني حبيت الي قبله اكثر، بس هذا استخدمه كمرطب صباحي، استخدمته بعد مع المكياج بس لانه بشرتي دهنية مانفعت معاي هاذي الحركة وايد، تخلي الفونيشن يدهن علي بسرعة مايثبت، مرات احط كمية بسيطة جدا وقت الدمج. الزيت لونه شافا بس فيه قطه الذهب تخلي لونه أصفر شوي، لازم تنرج الغرشة عدل قبل الاستخدام عشان يندمج الذهب مع الزيت.

ايي منه حجمين، الحجم العادي ٣٠ مل وسعره ٥٤ دولار امريكي، والحجم الصغير ١٥ مل وسعره ٣٥ دولار امريكي.

——————————————————————-

المنتج الثالث هو يونيكورن اسنس (سابقا يونيكورن تيرز)، وسبب تغيير الاسم انه فيه منتج ثاني بنفس الاسم فشركة فرسالي اضطرت انها تغير الاسم.

الحين هذا المنتج غير عن الي سبقوه، المنتجات الي تكلمت عنها قبل كلها زيوت ترطيب بس هذا سيروم او مصل، وهذا غير دهني، يعني قوامه مثل اي سيروم في السوق، تحطونه على البشرة بعد تنظيفها وقبل اي منتج ثاني، تحطون السيروم ٢-٣ نقط وتوزعونه على البشرة وينشف على طول، ممكن يترك أثر خفيف على البشرة بس شي لا يذكر، يعني هذا مب مرطب ولا زيت، هذا مصل يساعد البشرة على امتصاص المنتج الي بعده (الي هو المرطب).

ميزة السيروم انه يحافظ على البشرة من free radical damage الحين انا مايخصني في هل امور ولا اعرف اشرحها بس اعرف معناها لاني اقرأ وايد عن هل سوالف، بس باختصار انه هذا الضرر الي يصير في الجسم يسبب مشاكل صحية كثيرة وهذا السيروم يكافح هذا النوع من الضرر.

السيروم يهيأ البشره لاستقبال المواد الثانية مثل المرطب والمكياج، واذا بتستخدمونه كمنتج عناية حطوه على بشرة نظيفة وبعدين حطوا فوقه مرطب، وممكن تستخدمون زيت فرسالي الاسود او الابيض.

السيروم غني بمضادات الاكسدة الي يحارب الي تكلمت عنه قبل ال free radical damage وبعد شيخوخة البشرة مثل اجاي بيري، غوجي بيري، الدربيري والبلوبيري. الاجاي بيري والبلوبيري غنيين بمضادات الاكسدة وفيهم فيتامين سي. السيروم خطوة مهمة للعناية بالبشرة لانه يحتوي على مستويات عالية ومركزة من المكونات الفعالة.

هذا السيروم ممكن يستخدم كبرايمر قبل المكياج، تحطون ٢-٣ قطرات على الوجه وتحت العين وبعدين تبتدون بالمكياج، وبهل طريقة يخلي وضع المكياج سهل وسلس ودمجه أسهل، بيخلي الفونديشن يدوم فترة أطول والكونسيلر مايخطط.

كايشادو برايمر تحطون كمية بسيطة على الجفن، وهل شي بيحمي الشدو من انه يخطط ويدوم طول اليوم ويخلي اللون قوي.

واذا تبون الاضاءة او الهايلايت يكون قوي حطوا شوي من السيروم على عظمة الخد ونطروا لين يجف وبعدين حطوا الاضاءة او الهايلايت.

كل الكلام الي كتبته لكم فوق منقول من الموقع بترجمتي وطريقتي في الكلام، انا استخدم السيروم صار لي فترة بسيطة والي عندي غرشة الاصدار الأول والمحدود والي اسمه يونيكورن تيرز والي قلت لكم انه غيروا اسمه ليونيكورن اسنس، الي عندي ريحته ورد بس الاصدار الجديد بينزل قريب وبتكون ريحته حلاوه، حاليا السيروم غير متوفر بس بينزل في شهر فبراير.

أنا شخصيا استخدمه كسيروم قبل المرطب سوا زيوت فرسالي او غيره بس ماستخدمته كبرايمر للمكياج. حاليا له حجم واحد هو ٣٠ مل وسعره ٥٤ دولار امريكي. السيروم لونه وردي وفيه لمعة بس مايبين على البشرة.

اذا عندكم اي سؤال او استفسار تواصلوا معاي على الانستجرام تحت صورة منتجات فرسالي @thejulybloom