السلام عليكم

حبيت أكتب لكم تجربتي مع علاج الشعر اسمه البوتوكس، اكيد كثير منكم سمعوا بعلاجات الكيراتين والبوتوكس والبروتين وغيره، انا ماعندي خبرة او معرفة كافية عنهم غير اني بنقل لكم تجربتي الشخصية مع علاج البوتوكس وخطواته وطريقة المحافظة عليه، وين سويته وبكم.

أول شي بقول لكم اني كنت افكر اني اسوي بوتوكس الشعر من سنتين بس وايد كنت خايفة بسبب الي اقراه في النت واسمعه من تجارب البنات بس اكثر شي كنت اسمع عن تجربتهم مع الكيراتين مب البوتوكس، ،ولا مرة سمعت وحدة تكلمت عن البوتوكس، وسألت وايد صالونات وخبيرات شعر ماحسيت انه عندهم المعرفة الكافية عن البوتوكس بس الكيراتين، وبصراحة لما اشوف البنات الي يسوون شعرهم في الصالون اخاف اكثر لانه اشوف كمية الدخان الي يطلع من شعرهم وقت السشوار ومصصفة الشعر تحط ماسك على وجهها عشان الدخان، يعني المنظر كله يبين انه شي مب صحي وخطر على الصحة.

غير هذا سمعت من وايد بنات انه بعد الكيراتين بشهر شعرهم يبتدي يطيح بطريقة مب طبيعية وانعدم شعرهم وندموا انه سووه، وفي بنات يمدحونه ويقولون انه شعرهم صار ناعم وأملس ومستانين عليه، في النهاية انا خفت وحطيت أكبر X على الموضوع.

الشي الثاني بقول لكم عن طبيعة شعري وشو صار فيه وليش فكرت اني اسوي له بوتوكس، انا طبيعة شعري الاصلي ناعم من الجذور لين تقريبا ٢ أو ٣ انش وبعدين يصير مموج بس تموجاته كبيرة يعني ماكنت احتاج لا سشوار ولا اي شي شعري كان حلو وناعم بس اذا قصيت القذلة اعدلها بالسشوار او السيراميك.

بعد ماربيت ب ٦ شهور تقريبا لاحظت شعري من تحت صوب الرقبة انه صاير كيرلي بس ماسويت له سالفة قلت يمكن من الصبغة لاني وقتها سويت حق شعري اومبري وسوولي سحب لون فقلت يمكن شعري اخترب من السحب، بس لاحظت كل كم شهر يرتفع عندي الكيرلي وصار لين نص راسي، لين ماكملت بعدها بسنة او سنة ونص وصار شعري كامل كيرلي. طبعا صار فيني احباط نفسي لانه شعري تغير وسويت بحث وايد عن هل موضوع وشفت انه هل شي وايد منتشر ووايد بنات يشتكون من نفس الموضوع وله عدة اسباب منها الامراض المزمنة وأنواع من الأدوية مابدخل وايد في هل موضوع لانه كل جسم يفرق عن الثاني ممكن وحدة تاخذ نفس الدوا ومايتغير فيها شي وثانية بتاخذه ويسبب له تغييرات في الجسم.

من فترة قررت اني أوقف بحث وأسئلة وأجرب بنفسي لانه ماشفت حد فادني بشي الا بنت وحدة الله يجزيها خير هي الي تكلمت بكل صراحة مع تجربتها لا خبت ولا ادعت انها مب مسوية ماحست بأي احراج انها تشارك تجربتها وأشكرها جزيل الشكر لاني فعلا استفدت من كلامها.

وكلمت نفس الصالون الي هي تعاملت معاهم واسمه بيوتي ستيشن في دبي، تراسلت مع صاحبة الصالون على الواتساب وشرحت لي الموضوع من طأطأ الى السلام عليكم، ويتني الي تسوي الشعر للبيت بس عشان تقولي عن طبيعة شعري وشو الي بيصير فيه بعد العلاج، كلامها كان مختلف شوي عن صاحبة الصالون بس كل الي قالته لي صاحبة الصالون هو الي صار بالضبط. قالت لي انه علاج البوتوكس بيعالج الشعر التالف، ينفع للي شعرها دمران وتعبان وجاف من الصبغ او غيره وانا بصراحة مارحمته ابدا من الصبغ، البوتوكس مابيسوي شعري سيده، بيتم مموج مثل ماهو بس بيفرده بنسبة ٤٠٪ تقريبا على حسب نوع الشعر. يعني باختصار البوتوكس مايسوي الشعر أملس بيكون شعري مثل ماهو بس صحي ، والحلو فيه انه منتجاتهم خالية من مادة الفورمالين الضارة. ويتم مفعول العلاج على الشعر مدة ٤-٦ شهور على حسب العناية والاهتمام فيه.

بعدها بيمكن ٨ شهور تجرأت اني اسويه وهل كلام كان قبل راس السنة بكم يوم، تواصلت مع صاحبة الصالون وعطتني موعد بعدها بيومين، وقتها كنت مب صابغة جذور شعري، انا اصبغه فاتح وايد بس نصحتني انه ارجع اصبغه بعد العلاج باسبوعين. يتني البنت من الصبح تقريبا الساعة ٩، قالت لي أغسل شعري عدل بشامبو وماحط اي ماسك او بلسم عليه، بعدين حطت العلاج على شعري هو مثل الماسك كريمي حطته على شعري كامل ولفته بكيس بلاستك، ريحته مثل الروب القديم ما أزعجتني ريحته وايد كان عادي.

خليت الماسك هذا مدة ساعة وبعدها فتحت الكيس وتمت تمشط شعري مدة ١٠ دقايق بالمشط العادي، وقتها صار قوام الكريم شوي أثقل، وخلته زيادة على شعري مدة ٢٠ دقيقة، بعدها غسلت شعري بماي بس.

بعدها سشورت لي شعري بالسشوار وبعدها سوت لي بالستريتنر، عاد هذا يلست عليه تقريبا ساعتين لانه تاخذ خصل صغيرة وتتأكد انه سوته عدل، هذا وشعري خفيف وايد انا كلش شعري مافيه كثاقة بس طويل، وكل مازاد طول الشهر وكثاقته بياخذ وقت أكثر. وخلاص هاذي كانت آخر خطوة، ماشفت اي دخان مب طبيعي ولاريحة خايسة الحمدلله. فترة التريتمنت كلها خذت ٥ ساعات من اول مايتني لين ماخلصت.

وقتها كان شعري أملس أملس وايد من الستريتنر، بس لاحظت فيه لمعة رهيبة وملمسه واايد ناعم، بس هل نوع من العلاج يفتح من لون الشعر فشعري فتح زيادة درجتين.

ألحين الي تسوي هل نوع من العلاج لازم تحافظ عليه باستخدام الشامبو والبلسم المناسب ويكون هذا الشامبو والبلسم ترطيبه عالي وخالي من الكبريت والبرابين وهل مواد، اذا استخدمتوا شامبو عادي يحتوي علو هل مواد مفعول العلاج بيروح بسرعة من الشعر. انا خذت لي الشامبو والبلسم من الصالون من نفس ماركة العلاج الي اسمه DNA وبعدها استخدمت شامبو ناشي الي بالكولاجين مع البلسم ومنتجات ناشي خالية من هل مواد.

اضطريت اني اغسل شعري بعدها بيوم لانه كان وااايد دهني ولما غسلته شفت التغيير، صار شعري مموج بطريقة خفيفة جدا، وعرفت انه كل ماغسل شعري يطلع طبيعي اكثر، للأسف البوتوكس وايد سوا شعري دهني، قبل كنت أغسل شعري كل يومين ومن بعدها صرت اغسله كل يوم من كثر ماكان دهني، وكل مرة أغسله يصير مموج أكثر يعني يصير شكل شعري الطبيعي بس أنعم ومب كشة ومنفوش.

بس لاحظت انه كانت فيه ريحة في شعري ماحبيتها ابدا كانت وايد تزعجني فكنت أعطر وأبخر شعري كل يوم بعد ماغسله وتقريبا بعدها باسبوع او ١٠ أيام راحت الريحة بالكامل.

الحين صار لي شهر وشوي من سويته، مثل ماقلت قبل كل ماغسل شعري يطلع طبيعي اكثر، تموجاته تزيد، لاني كنت اغسل شعري كل يوم هل تموجات تطلع أسرع، اذا كان شعرج جاف ممكن بتغسلينه كل يومين او ٣ فمفعوله بيطول أكثر.  حاليا شعري فيه تموجات بس حلوة وطبيعية وانا مرتاحة وايد ماحتاج لا سشوار ولا ستريتنر، احس شعري الحين مثل ماكان قبل لايخترب شعري، أملس من الجذور لين ٢ أو ٣ انش وبعدين يصير مموج، ملمس شعري دايما ناعم وحيوي وفيه لمعة ومن سويت البوتوكس ولا مرة قربت السشوار او الستريتنر عليه، ارتحت وايد وايد، بعد لانه ملمسه ناعم وصحي ماحتاج كل هل ماسكات والزيوت الي كنت احطها قبل، بس مرة في الاسبوع احط ماسك وخلاص.

الشي الثاني الي لاحظته من اول ماسويت علاج البوتوكس انه التساقط خف وااايد كان قبل شعري وايد يتساقط ومن بعدها لاحظت انه يتساقط بشكل خفيف جدا، بس الحين من بعد شهر التساقط زاد شوي، يعني اتوقع لما يروح مفعول البوتوكس بيرجع شعري مثل ماكان مع التساقط.

والي سويته انه من بعد العلاج باسبوعين صبغت شعري كامل غامق، واستخدمت صبغة خالية من الامونيا عشان ماتضر الشعر او يروح مفعول البوتوكس، بس لاحظت انه اطرافه تقصفت فيبيله قص ،ان شاء الله بقصه قريب.

اعتقد اني غطيت تجربتي كاملة مع البوتوكس، مثل ماقلت قبل سويته عند صالون بيوتي ستيشن في دبي، بس عندهم خدمة منازل و يت البنت عندي في البيت سوت لي شعري وانا قاعدة مرتاحة بس طبعا السعر بيزيد، ماعرف بكم ياخذون في الصالون يمكن حوالي ألف درهم بس البنت قالت لي شعري يكلف ١٨٠٠ درهم، الشامبو والبلسم اشتريه من عندهم من نفس ماركة البوتوكس الي اسمه DNA وسعر كل واحد ١٢٠ درهم.

نتيجة الشعر بتختلف على حسب نوع الشعر مب كل وحدة بيطلع لها نفس النتيجة بس الي تبي شعر صحي وحيوي، يعني تخيلي شعرج الطبيعي بس احسن بوايد صحي وفيه لمعة لاجفاف ولاكشة وحالة سوي البوتوكس لانه مايفرد الشعر.

هذا رقم الصالون في دبي 043866000

وهذا رقم الموبايل 0527666713

وبعد عندهم موقع يبيع منتجات متنوعة ومكياج www.beautystation.ae

وهذا حسابهم على انستجرام @beautystationuae

اتمنى اني ماكون نسيت شي، والي حابة تسأل اي سؤال اكتبوا هني او على صورة البوتوكس في حسابي على انستجرام @thejulybloom